Kveikja ljós...með ananas?

Ég gerði heiðarlega tilraun til þess sl. nótt að kveikja ljós með niðursoðnum ananas.  Kannski væri réttara að segja að ég hafi ætlað að setja ananas í perustæðið, en ég var engu að síður nokkuð sannfærður um að það myndi ekki skila tilætluðum árangri.  Furðulegt.

Ég "vaknaði" um miðja síðustu nótt, búinn að dotta með tölvuna á lærunum yfir einhvers konar undirbúningi fyrir leiki dagsins í boltanum.  Dottkaflarnir urðu lengri og áhugaverðari; einhverra hluta vegna ákváðu fingurnir, í tiltölulega litlu samráði við heilann, að halda áfram að hreyfa sig nokkuð taktfast og af einbeittum skrifvilja.  Þegar ég skoðaði afraksturinn í morgun blasti við handrit að hádramatískum söngleik, þar sem forboðnar ástir, sviksemi og gróðavon toguðust á við væntumþykju og náungakærleik í bland við magnþrungna sorgar- og saknaðarsöngva og gleðilög af bestu gerð.  Það vottaði ekki fyrir knattspyrnupælingunum sem ég þurfti sárlega á að halda.
Ég hafði það af að stíga upp úr stólnum og leggja af stað inn í rúm, með viðkomu á baðherberginu.  Það vill svo skemmtilega til að baðherbergisslökkvarinn á systkini, óvirka og vita gagnslausa tvíbúra, sem búa rétt fyrir ofan hann og á leið minni inn á bað rak ég fingurinn í átt að þessum slökkvurum í þeim tilgangi að tendra ljós.  Ég hitti á óvirku tvíburana, sem þrátt fyrir skyldleikann, eru nokkuð ólíkir bróðurnum sem ræður yfir ljósadýrðinni á baðinu.  Það skilaði litlum árangri að fitla við þá og þar sem ég stóð og hamaðist á tökkunum gerði heilinn mjög heiðarlega tilraun til að koma þeim skilaboðum áleiðis að þetta væri vonlaus barátta.  Ég ákvað hins vegar, upp á mitt einsdæmi, að peran á baðinu væri sprungin.  Ég lagði leið mína inn í eldhús til að sækja nýja peru, man lítið eftir því ferðalagi og það næsta sem ég vissi var að ég stóð í almyrkvuðu baðherberginu með ananasdós í hönd.  Ananasinn er geymdur í næsta nágrenni við ljósaperurnar og þótt ég vissi það mætavel að það skilaði nákvæmlega engum árangri að setja ananasskífur í perustæðið var ég að hugsa um að láta á það reyna.  Maður veit aldrei.  Ég fór líka að velta því fyrir mér hver í fjandanum hefði sannfært mig um að lausnin á ljósleysinu fælist í...ananas.

Ég hugsaði aðeins um þetta í dag...og er nákvæmlega engu nær.

Annars er allt gott bara...þannig. 

Getraun þáttarins...hvaðan er þessi mynd...og af hverju er hún?

Athugasemdir

[Steingrímur Helgason, 8.4.2007 kl. 02:25]

Dósaananas virkar ekki sem ljósgjafi.   Ef þú kaupir heilann ananas í Hagkaup þá passar hann í samevrópsk perustæði, passaðu bara að hann sé (EU) merktur upp á 240V, því að þá endist hann betur en dótið sem að fæst í bónus, sem að brúkast varla út vikuna.

Þetta er gamall 'analog' mixer.

S.

[Hugarfluga, 8.4.2007 kl. 13:23]

Perur ... ananas. Eru þetta ekki hvort tveggja ávextir? Skil vel að þú hafir ruglast. Frábær pistill as usual. Gleðilega páska!

[HDR (IP-tala skráð) 8.4.2007 kl. 17:00]

Sem gamall hundur myndi ég giska á að myndin væri flugmóðurskipið í hljóðveri Rásar II (var reyndar alltaf miklu stærri og með fleiri tökkum, þ.e. fyrir digital byltinguna)

HDR

[Sardinan, 8.4.2007 kl. 21:16]

Dúddi, þú ert alveg drepfyndinn og frábær penni.

Gleðilega páska og já þetta eru takkar inn í herbergi.

[Snorri Sturluson, 8.4.2007 kl. 22:58]

Mér er efst í huga...þakklæti.  Gleðilega páska.

Jújú...myndin er af flugmóðurskipinu í hljóðveri númer eitt...aðalhljóðveri Rásar II.
Myndin blekkir reyndar, þetta skip er miklu stærra og tilkomumeira en gamla MBI-skipið sem var í kjallaranum...miklu meiri möguleikar á að klúðra einhverju og miklu fleiri takkar fyrir greindarhólana til að gramsa í. 
Stefnan hefur verið sett á að festa flugmóðurskipið allt á mynd um næstu helgi...mikið verður gaman þá!