Credo elvem etiam vivere!

Þráinn frændi minn Brjánsson hefur borið þann bagga allar götur síðan 1977 að afmælisdags hans verður fyrst og síðast minnst sem dánardægurs Elvis.  Engu að síður er fögnuður efstur í huga á þessum degi ár hvert, enda er Þráinn greindur, skemmtilegur og vandaður maður og á það á afrekaskránni að hafa trommað inn á hina stórmerku hljómplötu um Dolla dropa.  Ekki reyna samt að ræða það við hann.  Honum leiðist að tíunda eigin afrek.

Þar eð Elvis hefur verið áberandi í fjölmiðlum, af skiljanlegum ástæðum, rifjaðist upp fyrir mér umfjöllun Fjalars Sigurðarsonar um tvo Elvis-aðdáendur í Dagsljósi RÚV fyrir einhverjum árum.  Án þess að gera mér sérstakar vonir um væna uppskeru datt mér í hug að athuga hvort þetta efni leyndist í hirslum undraheimsins youtube...og það stóð heima.  Nýtið skilningarvitin og njótið.  Takið sérstaklega vel eftir ummælum sem hnjóta af vörum viðmælanda eftir 2 mínútur og 18 sekúndur...eða þar um bil.

Í ljósi þessi að þessi gleymdi gullmoli reyndist aðgengilegur á alnetinu gerði fortíðarþráin vart við sig.  Það rifjaðist upp fyrir mér að í árdaga Ópsins, hvers umsjónarmenn rötuðu af illskiljanlegum ástæðum í Kastljósið, var boðið upp á þá skemmtun að settar voru saman frekar ólíklegar hljómsveitir og þeim gert að leysa það verkefni að semja og flytja lag í þættinum.  Efnt var til einhvers konar samkeppni um besta lagið.  Þegnar þessa lands greiddu atkvæði á alnetinu og niðurstaðan staðfesti þann þráláta grun að meginþorri landsmanna er heyrnarsljór og tónvilltur.  Ég man ekki einu sinni hvaða lag "vann", en þetta voru klárlega tvö bestu lögin...ekki endilega í þessari röð.

Ég held ég muni það rétt að Vignir gítargoð hafi samið þetta lag.  Hann slær á strengi af alkunnri snilld, einn vanmetnasti bassaleikari þessa tilverustigs, Bergur Geirsson, spilar á bassann og Fúsi Óttars, hugsanlega besti trommari í heimi, situr við settið.  Það er gaman að geta þess enn og aftur að Fúsi hóf trommaraferilinn sinn á ljósbrúnu leðursófasetti foreldra minna í Víðilundi 4i.  Katrína úr Mammút toppar svo herlegheitin með frábærum söng.

Síðara lagið er dásamleg poppperla úr smiðju Dr. Gunna.  Doktorinn er einkar naskur á einfaldar en skemmtilegar laglínur.  Það skemmir heldur ekki fyrir að í þessu lagi er hann tvöfaldur; spilar bæði á gítar og bassa og stórsnjallir tæknimenn Ríkissjónvarpsins hafa væntanlega vætt buxur af spenningi og stolti yfir þeirri stórfenglegu tæknibrellu sem hér blasir við.  Ari Stefáns trommar og söngdívan Hildur Vala var á þessum tímapunkti að þoka sér inn á kortið.  Síðar kom í ljós að hún er ekki kortamanneskja. 

Ég var á sínum tíma hrifnastur af lagi Doktorsins.  Ég ætla bara að halda mig við það.  Þetta er ferlega gott lag.

Ég var að spá í að tjá mig um verðlagningu enska boltans, jafnvel þjónustuna, í löngu og ítarlegu máli.  Er það ráðlegt?

PS.  Ef einhver veit hvað Credo elvem etiam vivere þýðir fást fyrir það trilljón...nei skrilljón velvildarstig og gott umtal.

Athugasemdir

[Markús frá Djúpalæk, 17.8.2007 kl. 08:49]

Alltaf jafngaman að lesa það sem þú skrifar. En þú ert greinilega einn þeirra sem trúir að Elvis lifi. Ég líka reyndar, ef ekki í efni þá óefað í anda. Haltu áfram!

[Örvar Steingrímsson (IP-tala skráð) 17.8.2007 kl. 09:00]

Gott að maður komst framhjá þessari ruslvörn...

 En þetta myndband (Elvis) myndi sóma sér mjög vel í Fóstbræðrum, óbreytt. Algjör snilld!

[Ómar Eyþórsson, 17.8.2007 kl. 09:02]

Þess má til gamans geta að Jósep Elvis eftirherman sem kemur fram í fyrri klippunni ætlar að koma fram á menningartónleikum RVKFM 101,5 á Dillon á menningardag/nótt

[Markús frá Djúpalæk, 17.8.2007 kl. 09:12]

En ætli maður sé búinn að hafa upp á konunni sinni?

[Ingvar Valgeirsson, 17.8.2007 kl. 12:36]

Einhver sagði að ef réttlæti væri í heiminum væri Elvis lifandi og eftirhermurnar dauðar....

[Markús frá Djúpalæk, 17.8.2007 kl. 12:49]

Skrilljón velvildarstig og gott umtal óskast

[Snorri Sturluson, 17.8.2007 kl. 13:33]

Markús hefur tekið örugga forystu í velvildarstigakeppninni, en stigin skrilljón tryggja honum trilljón stiga forystu.  Ingvar fær nefnilega trilljón stig fyrir skilgreiningu sína á réttlæti heimsins.
Markús er greindur og skemmtilegur maður og með ást sinni á afreksfólki sem kennt er við Hlíðarenda opinberar hann djúpan skilning sinn á íþróttum.  Svo á hann ljósbláa derhúfu.

[Markús frá Djúpalæk, 17.8.2007 kl. 13:50]

Bláa derhúfan opinberar ást mína á spænskri borg sem engan lætur ósnortinn.

[Kristján Eldjárn Sighvatsson (IP-tala skráð) 17.8.2007 kl. 14:33]

Hver er Markús?

[Markús frá Djúpalæk, 17.8.2007 kl. 17:25]

Hrikalega óþægilegt alltaf að vera svona ósýnilegur

[arnar valgeirsson, 22.8.2007 kl. 23:15]

þráinn brjánsson frændi minn, fréttamaðurinn ógurlegi og fúsi óttars voru báðir trommarar í 1/2 7. sem var flott gruppa. en baraflokkurinn rændi fúsa. man ekki hvort hann var orðinn fjórtán....