Markaðssetning 103

Það er ekki hægt annað en að dást að og virða David Robert Joseph Beckham.  Vissulega er hann búinn ákveðnum kostum sem knattspyrnumaður, en það má deila um það hvort hann er besti knattspyrnumaður heims.  Enda hefur hann aldrei hlotið þá nafnbót formlega.  Virðingin snýst ekki bara um knattspyrnuna.  Honum hefur tekist að fullnýta hæfileika sína, ekki síður sem markaðsvara en knattspyrnumaður, sigrast á mótlæti og hreinlega setja ný viðmið að mörgu leyti.  Hann hefur starfað að góðgerðarmálum, m.a. á vegum Sameinuðu þjóðanna, og árin 2005 og 2006 var nafn hans oftar slegið inn í leitarstreng Google en nafn nokkurs annars íþróttamanns eða konu.  Hjónabandið og daglegt vafstur hefur vakið jafn mikla, ef ekki meiri, athygli og afrekin á knattspyrnuvellinum. 
Hvað eftir annað hafa spekingarnir talið kappann á hraðri niðurleið, en hann hefur ávallt brugðist við með því að bæta rós í hnappagatið, hvort sem það er mark beint úr aukaspyrnu, opnun knattspyrnuskóla eða nýr rakspíri.  Nú síðast átti hann að daga uppi sem leikmaður miðlungsliðs einhvers staðar í Evrópu.  Þá tekur hann sig til og flytur til Hollywood...og tekur fyrir það 18 milljarða.  Maðurinn er snillingur.

Þessi vistaskipti Beckhams eiga eftir að hafa áhrif á bandaríska knattspyrnu, en spurningin er bara hver þessi áhrif verða nákvæmlega.  Kannski verður þetta ekki sú vinsældasveifla sem forráðamenn bandarísku deildarinnar, MLS, eru að gera sér vonir um.  Líklega er þetta þó sniðugasta markaðsáætlunin sem völ er á og tilraunarinnar virði.  Menn hafa reynt eitt og annað til að auka áhuga Bandaríkjamanna á knattspyrnu.  Pele og Keisarinn voru meðal þeirra sem tóku sína síðustu spretti í bandaríska boltanum, tilkoma þeirra átti að hafa ákaflega jákvæð áhrif á þróun knattspyrnumála vestra en gerði lítið annað en að keyra deildina í gröfina.  HM í Bandaríkjunum hafði ekki þau áhrif sem menn höfðu vonast eftir, en hins vegar lifir kvennaknattspyrnan nokkuð góðu lífi, ekki síst eftir að háskólum voru settar þær reglur að þeir verða að eyða jafn miklum peningum í kvennaíþróttir og karlaíþróttir.  Knattspyrna er vinsæl meðal yngri kynslóðarinnar þar vestra, en einhverra hluta vegna snúa bandarísk ungmenni sér að öðru, jafnvel öðrum íþróttagreinum, svona um það leyti sem þau fara í háskóla.  Engu að síður er talsvert lagt í háskólaboltann. 
Bandaríkjamenn hafa stundum lagt fram tillögur að breytingum á leikreglum knattspyrnunnar.  Ég bý nú svo vel að hafa spilað "high-school bolta" í svo sem eins og eitt tímabil og jafnvel á þessum tímapunkti og á þessu stigi var reglunum breytt lítillega.  Leiktíminn var 4x20 mín., frjálsar innáskiptingar (eins og í öðrum bandarískum greinum) og tveir dómarar, enginn aðstoðardómari.  Allt var þetta gert til að fella knattspyrnuna að íþróttavenjum Bandaríkjamanna.   Reglunum verður hins vegar ekki breytt og þá er nærtækast að reyna að auka áhugann með stórstjörnu af dýrari gerðinni.
Beckham valdi LA Galaxy væntanlega fyrst og síðast vegna nálægðarinnar við hinar stjörnurnar og þeirrar staðreyndar að hann rekur knattspyrnuskóla í LA.  LA Galaxy er ekkert sérstakt knattspyrnulið, ekki einu sinni á bandarískan mælikvarða.  Galaxy komst ekki í úrslitakeppnina á síðustu leiktíð og með liðinu leikur aðeins einn nafntogaður leikmaður, Landon Donovan.  Einhverjir muna kannski eftir þjálfara liðsins úr enska boltanum, hinum kanadíska Frank Yallop, sem lék með Ipswich Town fyrir margt löngu.  Framkvæmdastjóri LA Galaxy er svo hinn magnaði Alexie Lalas, ein skærasta stjarna bandaríska landsliðsins fyrr og síðar og ágætur gítarleikari og söngvari. 

Svona leit Lalas út....

...en aukinni ábyrgð fylgir m.a. rakstur!

Fátt er meira rætt á bandarískum íþróttasíðum þessa dagana en þessi nýjasta viðbót í Beckerly Hills, sem þýðir að fyrsta skrefið í þessari markaðsáætlun er ágætlega heppnað.  Þótt Bandaríkjamenn séu markaðshyggjumenn og almennt sáttir við að menn uppskeri laun erfiðisins gætu tíðar peningaflutningaferðir að Beckham-heimilinu haft neikvæðar afleiðingar í för með sér.  Davíð litli fær 500 sinnum hærri laun en liðsfélagarnir!  Í MLS-deildinni er launaþak upp á u.þ.b. 1 milljón dollara á ári á lið, 50 þúsund dollara á mann eða því sem næst, en hvert lið má hafa einn leikmann sem ekki dvelur undir þessu þaki.  Í tilfelli LA Galaxy er það David Beckham, sem fær 18 milljarða króna fyrir fimm ára samning.  Hafnaboltamaðurinn Alex Rodriguez fær nánast sömu upphæð fyrir að dandalast með Texas Rangers, en hann er helmingi lengur að landa sínum milljörðum en Beckham.  Það sem flækist fyrir spekingunum er kannski ekki launaupphæðin sjálf, þeir telja flestir peningunum vel varið, heldur sú staðreynd að launamunurinn er svo gígantiskur að það gæti haft áhrif á móralinn í liðinu, deildinni og jafnvel gert það að verkum að andstæðingarnir leggi áherslu á það að stöðva milljarðamæringinn með öllum tiltækum ráðum.

Hvað sem hverjum kann að finnast um David Beckham, á köflum siðlausa markaðssetningu (sbr. sölu á ljósmyndarétti brúðkaupsins og barnanna), eiginkonuna (!) og sitthvað fleira verður ekki horft framhjá því að hann kann sitt fag.  Hann kann a.m.k. að ráða til vinnu fólk sem kann til verka. 

Vonandi finnur Victoria fallegt og vel hannað hús.

Athugasemdir

[Beckham (IP-tala skráð) 12.1.2007 kl. 15:15]

sem fyrrum íþróttafréttamaður kútur...check your facts !   Beckham fær 10 milljón dollara í laun á ári...sem er MINNA en Eiður Smári fær hjá Barcelona.

80% af þessum "risa" samningi eru VÆNTAR framtíðartekjur af varningasölu !

 AÐ tilkynna skitasamning við skítalið í USA er álíka interessant og tilkynna skítasamning við skítalið í islensku hokkídeildinni !

 Nobody cares....og því grípur umbi Beckhams sem m.a. stofnaði Spice Girls og fann upp Pop Idol til þess að reikna út MÖGULEGAR varningatekjur í 300 milljóna landi eins og usa !

 sannleikurinn er sá að bekki litli fær 10 millur dollara í laun á ári....sem er nú ekkert sérstakt....sjúmi t.d. fékk 40 millur euros á ári....fyrir utan varning.

 þannig.....bara niðurlægjandi fyrir kappann...dottinn úr enska landsliðinu og REAL vill ekkert með hann hafa.....

 sorry to ruin your lofrullu above my friend.

PS: Ef þú vilt checka þetta af þá er CNN með ágætis frétt um þetta undir sports.....

[Snorri Sturluson, 12.1.2007 kl. 15:34]

Ég minntist ekki einu orði á bein laun...enda heitir pistillinn Markaðssetning 103.   Hvað hann fær í laun, hvað hann halar inn í formi auglýsinga- og styrktarsamninga og launatekjur annarra íþróttamanna koma málinu í rauninni ekki við; þetta snýst um markaðssetningu knattspyrnunnar í Bandaríkjunum og þá staðreynd að maðurinn sem virtist á hraðri niðurleið stekkur á vagninn og hefur upp úr krafsinu milljarða á milljarða ofan.  Hann þénar í rauninni ekki í samræmi við eiginlega hæfileika.  Um það snýst málið...og fyrir það á hann skilið aðdáun og virðingu.

[beckham (IP-tala skráð) 12.1.2007 kl. 16:01]

hmm...félagi !   Þú segir:

"Í tilfelli LA Galaxy er það David Beckham, sem fær 18 milljarða króna fyrir fimm ára samning.  Hafnaboltamaðurinn Alex Rodriguez fær nánast sömu upphæð fyrir að dandalast með Texas Rangers, en hann er helmingi lengur að landa sínum milljörðum en Beckham. "

 en segist ekki minnast einu orði á bein laun ?  Hafnaboltastjarnan fær þessi LAUN...og er því ekki tvöfalt lengri en Beckham að þéna þessa peninga.  Hann er POTTÞÉTT með þessi laun...Beckham er dropi í hafið. 

félagi, kommerat, amigo.....

REAL á stóran hluta í þessum sponsor samningum.

 Sumir stórir sponsor dílar eru að detta út.

Skv. fræðimönnum þarna vestra þarf ansi mikið að gerast til að hann nái 200 milljóna usd varningasölu....ansi ansi mikið !!

Þú segir Beckham taka 18 milljarða fyrir 5 ára samning og sé snillingur.

Sannleikurinn er:  Hann fær 700 millur á ári...hitt er bara skot út í loftið um mögulegar framtíðartekjur upp á 14 milljarða í varningasölu...og með fullri virðingu Snorri...Beckham er álíka frægur í USA og Geir Ólafs.    og að þeir muni eyða 100 milljón dollurum í varning tengd Beckham er bara, væg til orða tekið óskhyggja dauðans!

Það er svipað og topp varningur í leikfangabransanum þar vestra...

bottom line: Þetta er bull og Simon fuller líkt og einar bárðar gerði með Nylon sendir frá sér bull tilkynningar sem eru svo teknar gagnrýnislaust til greina.

Manstu eftir fyrstu frétt Stöðvar 2 og RÚV varðandi "NYLON í 1.sæti í Bretlandi ?"    Ef menn hefðu kannað það frekar hefðu þeir fljótt séð að um SPILUNARLISTA 4 dansútvarpsstöðva var að ræða...af þúsundum í UK.   EKKI sölulisti.

En fréttin var "NYLON í 1.sæti í Bretlandi".......

 Sorry pal, buddy, friend....þetta er býsna skitlegur samningur við skítalíð.....og þessar tekjutölur eiga ekki við nein rök að styðjast því miður.

[Snorri Sturluson, 12.1.2007 kl. 16:41]

Cara mia.  Enn ertu að missa þig í launatölum. 
Það má vel vera að ég hafi orðað þetta vitleysislega, en pælingar mínar snúast alls ekki um launin sem slík, þótt vissulega sé tölum slengt fram og ég hafi nefnt Rodriguez til samanburðar.  Tekjumöguleikarnir gera framtíðarplön kappans bara athyglisverðari.  Það sem vekur áhuga minn og aðdáun er tækifærisnýting kappans og þessi "tilraun" sem þeir eru að gera fyrir vestan.  Áhugi minn litast vissulega af búsetu og ómældum knattspyrnuafrekum á bandarískri grundu fyrir margt löngu!

Markaðssetning Beckhams er til fyrirmyndar og líklega hefðu verið fluttar langar og ítarlegar fréttir um vistaskipti hans hvert sem hann hefði farið.  Það að hann fari til Bandaríkjanna gerir fréttina mun áhugaverðari og auðvitað eru tekjumöguleikarnir tíundaðir, enda maðurinn kominn af allra léttasta skeiðinu og gerir vel að koma sér í þá stöðu að eiga möguleika á að þéna einhverja milljarða á þessum tímapunkti knattspyrnuferilsins. 
Nylon-dæmið er ágætt, en Beckham er þó bæði talsvert frægari en hinar meintu söngkonur og um möguleika hans í stöðunni verður ekki deilt.  Punkturinn þó góður og gildur.
Það er kannski einmitt þetta, þessi gegndarlausi fréttaflutningur, sem verður til þess að maður fer að velta þessum málum fyrir sér og taka hattinn ofan fyrir manni sem einhvern virðist alltaf ná að snúa taflinu sér í hag.

[Bjarney Bjarnadóttir, 12.1.2007 kl. 22:28]

Úff einhver bitur "Beckham" á ferðinni hér!

En gæti ekki verið örlítill möguleiki að kannski séu það ekki peningarnir sem ráða för Bechams að öllu leyti? Kannski er hann að fara til USA einmitt af því að þar er hann dropi í hafið og getur því loksins rekið við án þess að því sé slegið upp sem forsíðufrétt! Hann er 31 árs, dottinn útur enska landsliðinu og skv. Steve Mclaren þarf mikið að gerast til að hann verði valinn aftur, þannig að kannski ákvað hann að sætta sig við að knattspyrnuferillinn fer að líða undir lok, og hann langar að eyða meiri tíma með fjölskyldunni sinni án endalausrar gagnrýni og ágangs fjölmiðla! En svo ef honum leiðist þegar hann hættir í fótbolta þá er nottla Hollywood þarna við hliðiná og þar getur hann (nú eða Victoria) startað nýjum ferli..!

Bjarney málefnalega leggur orð í belg

[Sverrir Páll Erlendsson, 12.1.2007 kl. 23:24]

Fallega sagt um meintar söngkonur. Vill til að frú Beckham er ein af þeim. Hef reyndar grun um að hún hafi haft einhver áhrif á að selja geltröllið, maninn sinn. En hann hefur lært trikkin. Sé samt í augunum á honum að hann bíður færis að losa sig við frú Anorexíu og vera annar maður en eiginmaðurinn hennar Viktoríu. Það verður ekki langt þangað til. En fótbolti? Hvenær hefur hann skipt máli í þessari veröld? Ég meina það í alvöru!

[Doddi (IP-tala skráð) 17.1.2007 kl. 09:56]

Ég held að S. Sturluson hafi gert hvað mest fyrir Ammrískan "Soccer" in the 80´s.

Það verður ekkert toppað hvort sem maðurinn heitir Beckham, Geir Ólafs eða Ronaldo.

Og jú ég hefði ekkert á móti því að vera með þessi aumingja laun hans....

 Doddi liltli