Er ekki bara málið...

...að krýna Færeyinginn sigurvegara og hætta þessu rugli? 

Einhverra hluta vegna virðast sumir standa í, eða hafa staðið í, þeirri trú að færeysk tónlist sé algjörlega kæst.  Það er misskilningur.  Hún er fersk.  Einhverjir kunna að muna eftir Tý og Viking Bandinu og svo hefur Eivör auðvitað borið hróður færeyskrar tónlistar víða.  Síðustu misserin hafa sprottið upp glimrandi fínar hljómsveitir og listamenn í Færeyjum; Deja Vu, Marius, Högni Lisberg, Teitur, Lena og Gestir svo fátt eitt sé nefnt.  Gestir eiga einmitt lag í tónlistarspilaranum hérna til hliðar, minna á köflum pínulítið á Radiohead, svona líka ljómandi fínir.  Ekki má gleyma G-Festivalinu í Götu, sem ber kraumandi tónlistarlífinu í Færeyjum fagurt vitni. 

Skaust á bílasölu í dag, skutlaði Gissa frænda að sækja "nýjan" bíl.  Hann keypti sér lítinn og skrítinn Peugeot, svo hrottalega upptjúnaðan að ég á ekki von á öðru en að hann snúi allt undan sér innan fjögurra vikna.  Bíllinn sko.  Á bílasölunni voru tveir innibílar og samanlagt verðmæti þeirra var 24 milljónir króna.  Audi-jeppinn kostaði 11 milljónir, sem er kannski réttlætanlegt upp að vissu marki, og Porche-inn kostaði 13 milljónir.  Verðmiðinn var næstum því stærri en bíllinn sjálfur.  Ég myndi hugsanlega kaupa svona bíl ef ég væri með trilljón í mánaðarlaun.  Ég myndi þá skutla honum í skottið á Skódanum og skjótast með hann heim.

Það kemur á óvart að ekki skuli hafa borist svar við getraun snorrans.  Það eru komnar vaðandi vísbendingar; faðir einsmellungsins er stórmógúll í tónlistarheiminum og í þessu eina lagi hans sem vakti athygli syngur einn þekktasta tónlistarmaður síðari tíma.  Nafn Debarge hefur borið á góma...og það vill svo skemmtilega til að James DeBarge var til skamms tíma mágur þekkta tónlistarmannsins.

Þetta er pabbi einsmellungsins...

Athugasemdir

[Sardinan, 16.3.2007 kl. 23:39]

Hmmmmmm nú er ég kvartfæreyingur en einhverra hluta vegna syng ég samt eins og hjólsög.

[Doddi (IP-tala skráð) 17.3.2007 kl. 09:42]

Getur verið að söngvarinn er Rockwell og lagið er Somebody´s Watching Me þar sem Michael Jackson söng með honum í viðlaginu

Doddi 

[Snorri Sturluson, 17.3.2007 kl. 10:37]

Þar kom það!  Rockwell heitir réttu nafni Kenneth Gordy og er sonur Berry Gordy, stofnanda Motown Records.  Ætternið þótti skýra að nokkru leyti þá staðreynd að hæfileikasnauður tónlistarmaðurinn fékk plötusamning og Michael Jackson til að syngja með sér, en því hefur reyndar verið haldið fram að hann hafi "falið" það hverra manna hann var þegar hann gerði samninginn (eins og enginn hjá Motown hafi þekkt son aðal mannsins!) og að söngur Jacksons hafi verið greiði við æskuvin frekar en hlýðni við yfirvaldið.

Gott Doddi...mjöööög gott.

[Hugarfluga, 17.3.2007 kl. 13:08]

Gott Doddi??  *hrmpfh* Ég svaraði þessu í gærkveldi hérna neðar. I'm one pissed off hunnybunny now.

[Snorri Sturluson, 17.3.2007 kl. 18:44]

Æ...sá það ekki fyrr en núna.  Errare humanum est!  Hrósið er hér með formlega tekið af Dodda...og fært yfir á Hugarflugu.

[Hugarfluga, 17.3.2007 kl. 20:37]

Hehe, þakkaflóð skaltu fá, Snorri sonur Sturlu!

[Elías Þór (IP-tala skráð) 19.3.2007 kl. 10:46]

Það er önnur getraun í gangi á blogginu mínu .

kv.
Elías Þór

[Sverrir Páll Erlendsson, 19.3.2007 kl. 23:57]

Sammála þessu um Færeyinginn. En þetta er því miður ekki söngkeppni heldur keppni um að eiga dugmesta GSMhringjara úti í bæ. 

Stóð gersamlega á gati í getrauninni. 

[Hilmar (IP-tala skráð) 27.3.2007 kl. 16:51]

Þú hefur örugglega fengið þessa spurningu áður, en afhverju ertu ekki kominn á Reykjavík 101,5? Allt það besta er komið nema Snorralaugin mín (og Valtýr með Skoðunina sína)

Djóklaust, ég hætti að hlusta á útvarp þegar ykkur var lokað á sínum tíma.