Höddi klappaði á Old Trafford!

Höddi Magg gladdi mig mjög með vel ígrundaðri yfirlýsingu sem hann kastaði fram í miðjum leik Fram og Vals í Laugardalnum.  "Heldurðu að ég hafi ekki staðið upp á klappað á Old Trafford!!!"  Fyrirfram hefði ég talið þetta álíka líklegt og að ég borgaði mig inn á leik með Þór.  Hörður er nefnilega týpan sem tuðar nákvæmlega ekkert yfir matvæla- og/eða bensínverði á Íslandi, veðrinu eða lélegri sjónvarpsdagskrá.  Hann tekur leikmannakaup og leikskipulag Liverpool hins vegar mjög alvarlega.  Svo alvarlega að það veldur stundum áhyggjum innan fjölskyldunnar og vinahópsins.  Þess vegna er merkilegt að hann standi upp á klappi á heimavelli erkifjendanna.  Reyndar er merkilegt að hann skuli heimsækja Old Trafford ótilneyddur.  Það voru reyndar ekki ómerkari menn en Phil Collins, Mike Rutherford og Tony Banks sem drógu hann þangað.  Genesis.  Þegar Höddi reyndi að segja mér frá tónleikaupplifuninni missti hann fljótlega þráðinn, varð dreyminn á svipinn og táraðist.  Hér er lítið sýnishorn.

Victoria Beckham hefur náð þeim merka áfanga að nafn hennar eitt og sér kallar fram neikvæð og óæskileg líkamleg viðbrögð.  Hvernig er hægt að vera svona...algjörlega úti að skíta?  Hún hefur m.a.s. haldið því fram, í fúlustu alvöru, að hún sé hæfileikarík tónlistarkona sem muni láta til sín taka þegar eiginmaðurinn hefur lagt skóna á hilluna.  Raunveruleikafirring í sinni tærustu mynd.

Um helgina reiddist ég í fyrsta sinn yfir bloggfærslu.  Ég gerði athugasemd við færsluna, en athugasemdin var fjarlægð skömmu síðar.  Þeir sem dóla sér í hópi vinsælustu Moggabloggara virðast sumir hverjir telja turn sinn svo háan að þeir þurfa ekki að taka mark á mjóróma almúganum.
Umrædd færsla var andlátstilkynning.  Þjóðþekktur einstaklingur féll frá um helgina og bloggari einn, sem virðist aðallega sækja vinsældir í að endursegja fréttir mbl.is á frekar undarlegan hátt, sá sig knúinn til að tilkynna andlátið í bloggheimum.  Mér fannst tímasetning bloggfærslunnar ósmekkleg, alvöru fréttamenn umgangast tíðindi sem þessi af ákveðinni virðingu og gefa aðstandendum viðeigandi svigrúm.  Ég er ekki að finna að því viðkomandi bloggari tjái sig eða votti virðingu sína.  Þetta snýst um tímasetningu og framsetningu.  Ætla má að athyglisþörf, hugsanlega ásókn í viðurkenningu og umtal, hafi hér ráðið för og mér blöskraði.
Þetta vekur mann til umhugsunar.  Bloggheimar eru orðnir stórir og áhrifamiklir, hægt er að reka þar fréttaþjónustu af nánast hvaða gerð sem er ef út í það er farið og hugsanlega sækja nokkrar vinsældir, en vandi fylgir vegsemd hverri.  Ég gæti tekið upp á því að bulla og steypa um þekkta og lítt þekkta þjóðfélagsþegna, jafnvel fremja mannorðsmorð á blogginu.  Ég gæti líka tekið upp á því að opinbera mismerkileg leyndarmál af öllum stærðum og gerðum.  Ég hef vissulega frelsi til þess.  Frelsið er yndislegt, svo vitnað sé í skáldið, en því fylgir líka ábyrgð.  Mikil ábyrgð.  Lykilorðin í þessu samhengi eru siðferði og tillitssemi.  Það sem skrifað er í bloggheimum er nefnilega í langflestum tilvikum aðgengilegt heimsbyggðinni allri. 
Það er stór munur á því að gera góðlátlegt grín, jafnvel lýsa skoðunum sínum á mönnum og málefnum, og birta andlátsfregnir.  Þar erum við komin yfir hina hárfínu línu.  Hvar sem hún svo liggur nákvæmlega.

Athugasemdir

[Hannes Heimir Friðbjörnsson, 17.7.2007 kl. 09:43]

Ég klappaði eitt sinn á Anfield, en þeim fer fækkandi stundunum sem við Leedsarar getum klappað.

[Rúnar Birgir Gíslason, 17.7.2007 kl. 10:44]

Alveg er ég hjartanlega sammála þér Snorri að maður þarf að gæta siðferðis í skrifum sínum, þannig ávinnur maður sér virðingu og trausts.

Þó félagaskipti í körfuknattleik séu ekki sambærileg við andlátsfréttir þá er það samt þannig að maður skrifar ekki allt sem maður heyrir um leið og maður heyrir það. Maður fær staðfestingu hjá réttum aðilum og ber það undir þá sem málið varða hvort maður megi birta það.

Það er vinnuregla okkar á karfan.is

[Ingvar Valgeirsson, 17.7.2007 kl. 11:32]

Vinnufélagi minn og sveitungi okkar var á þessum tónleikum krakkanna í Genesis. Lítið annað hefur komist í spilarann í búðinni síðan. Það er gaman þegar Lamb lies down on Broadway eða That´s all fara í gang. Ekki jafn gaman þegar Invisible Touch er á blasti...

Varðandi blogg um andlátsfréttir og annað - sumt fólk virðist sjá sig knúið til að tjá sig um hverja einustu frétt á mbl.is. Mér persónulega finnst það einkar asnalegt, eiginlega í sumum tilfellum verulega aumkunarvert - hefur fólk ekkert annað til málanna að leggja en að endursegja fréttir. Sjálfur hef ég ekki alltaf látið fullkomið þekkingarleysi á málefnum aftra því ð ég myndi mér gallharða skoðun, en gaddemitt, ekki oft á dag!

Ég ákvað samt að tjá mig ögn um fréttina um ótímabæra andlátsfrétt hundkvikindis. Enda vart hægt að sleppa því að tjá sig.

[Höddi Magg (IP-tala skráð) 17.7.2007 kl. 11:52]

Gaman að lesa að einhver annar Íslendingur en ég og kærastan voru á gamla klósettinu eins og völlurinn er stundum nefndur Genesis einfaldlega besta band sögunnar nenni ekki að ræða það frekar. Annars skemmtileg greinn SS.

[Snorri Sturluson, 17.7.2007 kl. 16:53]

Gamla klósettið!  Vonandi notar Hörður þetta heiti á stærsta völl  Bretlandseyja þegar hann fer að lesa leiklýsingar í beinni sjónvarpsútsendingu.

Hannes minn.  Aðdáun mín á þér og trúfestu þinni hefur aukist til muna.  Það er erfitt að vera Leeds-ari.  Svona svipað og að vera KA-maður.  Sumri var hins vegar bjargað með sigri á Þór í gærkveldi.  Leeds var endanlega sturtað niður með kaupum Bates.  Hann á bara að reka vegamótel með móður sinni.

[Ingvar Valgeirsson, 17.7.2007 kl. 19:24]

Hugsa sér að Arnljotur, bróðurómynd mín, eigi sér bræður í Leeds ennþá. Gaman að því. Ég, þó antísportisti sé gallharður, dáist að ykkur.

[arnar valgeirsson, 17.7.2007 kl. 19:53]

veit um nokkra sem fóru að sjá genesis, bæði í london og köben. allir voða glaðir þó gabriel sé að chilla í rythmarjóðri í afríku.

sammála þér snorri, nú og þeim sem tjá sig hér, um að eilíf bloggafréttsblogg eru býsna hvimleið. sumir nota aldrei, aðrir stundum en einhverjir alltaf. frekar leim.

Leeds United er lífið sjálft. við komum aftur. sjáðu bara jóhönnu. KA þarf smá tíma til að rétta þetta af, kemur allt saman.