Plata ársins?

Það er vel hugsanlegt að plata ársins á Íslandi hafi komið út í gær.  Grínlaust. 

Þetta er platan hans Bjarka Sig, sem hingað til hefur birst landsmönnum í hlutverki handboltamanns í fremstu röð.  Bjarki hefur stundum verið skilgreindur sem "bróðir Lalla og Dags", en líklega verður þetta til þess að fjármálamógúllinn í Lúxemborg og handboltahetjan í Austurríki og verðandi framkvæmdastjóri Vals verða héðan í frá skilgreindir sem "bræður Bjarka"!

Þetta er undarlega heillandi og grípandi plata og kemur á óvart við hverja hlustun.  Ég vissi svo sem að Bjarki væri að gutla á gítarinn sinn, en var algjörlega grunlaus um þá hæfileika sem drengurinn býr yfir.  Hann teygir sig, á afar smekklegan hátt, í ýmsar áttir og það má með góðum vilja heyra nokkra áhrifavalda, en allt er þetta þó þegar allt kemur til alls...b.sig.
Ef einhver ætlar að hirða af honum heiðursútnefninguna fyrir plötu ársins er þeim hinum sama vissara að girða sig í brók.  Hugsanlega að fá Sir Paul McCartney til að leggja eitthvað af mörkum.

Eins og tónlistarmanna er siður er b.sig búinn að opna heimasíðu.  Síðan lítur dúndrandi vel út, enda á hún ættir að rekja til Dalvíkur!  Langsótt?  Nee.  Maðurinn á bak við fyrirtækið sem hannar síðuna er Jónas frændi minn.  Heimurinn er lítill og undarlegur.
Það eina sem vantar inn á síðuna er hlustunarmöguleiki, en það skrifast væntanlega á tímaþröng frekar en yfirsjón.  Ég tók mér það bessaleyfi að smella tveimur lögum inn á spilarann hérna til hliðar.  Höfundarréttarkærufrestur rann hvort eð er út á hádegi í dag.

Ég leitaði að gamni að myndum sem tengjast b.sig á veraldarvefnum og sá þá mér til mikillar gleði að í borginni sem aldrei sefur, Nýju Jórvík, hefur hópur hjólreiðamanna komið saman til að fagna útkomu plötunnar.  Þetta eru væntanlega fyrstu merkin landvinninga listamannsins.

Kaupa kvikindið...og ekkert rugl!  Eymundsson og/eða Penninn.  Það er langflottast að kaupa sitt hvort eintakið í sitt hvorri búðinni.

Athugasemdir

[Rúnar Birgir Gíslason, 1.5.2007 kl. 14:51]

Gætir farið í Mál og Menningu líka og þar á eftir Griffil, jafnvel fleiri búðir og alltaf verið að styrkja Kidda Vilbergs.

[Hugarfluga, 1.5.2007 kl. 17:22]

Hey kúl! Takk fyrir ábendinguna. Alltaf gaman að kynnast nýjum tónlistarmönnum. Bjarki kemur sterkur inn.

[Trausti frændi (IP-tala skráð) 1.5.2007 kl. 23:00]

... ertu viss um að þetta sé "Bjarki Sig" Bjarki Sig? Handbolta "gamla kempan" Bjarki sig?  Hann er ekkert líkur manninum á myndinni, né hinni myndinni..... erettekki einhver mis.....?  hmmm..

En músíkin er fín sko

[Snorri Sturluson, 1.5.2007 kl. 23:55]

Trausti íþróttabuff!  Þetta er Bjarki Sigurðsson Dagssonar, Valsmaður fram í fingurgóma.  Bjarki hinn eldri er sonur Sigga vélstjóra, sem ég sigldi með á Dalborgu á sínum tíma, ferlega flinkur handboltamaður en af tónlistarafrekum hans fara færri sögur.

[Trausti buff (IP-tala skráð) 2.5.2007 kl. 19:45]

.. mér finnst buff gott.  Óþarfi að hafa fleiri BS en nauðsynlegt finnst mér.

[Jónas Björgvin Antonsson, 10.5.2007 kl. 01:07]

Sæll frændi og takk fyrir gott komment á síðuna! Sammála um að þarna er dúndur plata á ferð.

Það er búið að smella 2 lögum inn á síðuna svo nú er hægt að hlusta á þessa eðal tóna. Einnig er búið að tengja lítið fréttakerfi við herlegheitin svo fólk ætti vonandi að geta fylgst með öllu sem gerist í framhaldinu hjá b.sig

J# (Dalvíkingurinn)