Frændur í fjöru

Uppfræðsla afkomendanna.  Synirnir voru ekkert sérlega hrifnir af stuttri kennslustund í sjávarföllum, mikilvægi hafsins og lífríkinu í fjörunni.  Hellisgötu-fjaran í Hafnarfirði er fjarri því að geta talist víðfeðm og hún er aukinheldur sandskroppin.  Staðurinn var þó valinn af sérstakri natni og þar var stærð drengjanna höfð til hliðsjónar.  Ef tekið hefði verið tillit til þess hvernig þeir upplifa sig sjálfir hefðum við þurft að keyra austur á Skeiðarársand.
Þeir voru ekkert sérlega hrifnir af sjónum.  Það þýddi lítið að reyna að benda þeim á að þarna ættu fiskarnir heima.  Þeim er ekkert um fiska gefið.  Tumi var á heimspekilegum nótum og skoðaði sig um á meðan Númi reyndi að murka líftóruna úr hamborgarabréfi og undirstrikaði líkamlega yfirburði sína með því að urra og gelta á allt sem hreyfðist, lífs og liðið.

  

Íþróttafrétt helgarinnar var lesin úr þularstofu í Efstaleiti á miðnætti á laugardag.  Í upphafi fréttarinnar sagði, lauslega þýtt og endursagt, að FH hefði tryggt sér bikarmeistaratitlinn í knattspyrnu í fyrsta sinn í sögu félagins með því að leggja Fjölni að velli, 2-0, í úrslitaleik.  Matthías Guðmundsson kom FH yfir, en Gunnar Már Guðmundsson jafnaði metin fyrir HK!  Þulur las þetta athugasemdalaust, rétt eins og textinn væri úr hinni helgu bók.  Merkilegt.

Athugasemdir

[Fiðrildi, 8.10.2007 kl. 21:42]

Prófaðu fjörurnar á suðurnesjum . . . þá finnið þið ýmislegt spennandi auk sjávarfangsins . . . t.d. dauða máfa, landsbyggðarfólk og spennandi sjoppur á leiðinni heim.  Voðalega er Tumi sætur.

[arnar valgeirsson, 9.10.2007 kl. 19:53]

bara að láta vita að listinn er í vinnslu. kominn í sautján lög en á eftir að bæta við og skera svo aftur niður.....

þetta eru unglingsárin, dynheimar, verbúðarárin og fullorðinsárin part eitt. alveg brakandi nostalgía og fólk á eftir að gefa í á druslunum sínum, á rúntinum á akureyri, húsavík og í borginni...

hvenær er næsta langa vakt í turninum?