Hvernig er það...

...hver ábyrgist kórrétta talningu atkvæða í síma- og/eða netkosningum, eins og t.d. í kringum Evrópusjónina?  Fulltrúi sýslumanns er viðstaddur útdráttinn í Lottóinu, svona sem dæmi...og hann tekur starf sitt alvarlega.  Það borgar sig ekki að reyna að lyfta upp stemmingunni rétt fyrir Lottódrátt með íslenskri kímni og gamansögum, það þekki ég af eigin reynslu.  En hver ábyrgist atkvæðatalningu í svona símakosningu?  Mér er það stórlega til efs að hinn hæfileikaríki Einar Bárðarson hafi lagt það í hendur hins tónvillta hluta þjóðarinnar að velja sigurvegarann í ædolinu...og þar með næsta skjólstæðing sinn.  Alls ekki illa meint gagnvart Einari, sem er drengur góður.  Það stakk mig svolítið að sjá í Laugardagslögunum, sem ég fylgist nú ekki beinlínis með af áfergju, að úrslit kvöldsins berast Borgarfjarðarundrinu (í jákvæðri merkingu) á tveimur litlum blaðsneplum.  Hvernig vitum við nema að þetta séu allt speglar og falskur botn, að einhver eða einhverjir séu búnir að ákveða hvaða lag verður sent til keppni?  Þetta er atkvæðagreiðsla í orðsins fyllstu merkingu, því það kostar sitt að leggja lóð á vogarskálarnar...en er eitthvað gert með þessi atkvæði?

Það fór eins og mig grunaði.  Dalvísk handboltahugmyndafræði, sem komið var á framfæri á hógværan og hófstilltan hátt í Bavnehöj Hallen fyrir þremur áratugum eða svo, tryggði danskan sigur á EM.  Til að fagna þessum árangri munu öll munnleg samskipti í Suðurhólunum fara fram á dönsku þar til sigurvíman fer að dvína.  Það gæti tekið nokkrar vikur.

Ég rétti yngri dóttur minni hjálparhönd með heimalærdóminn fyrir skemmstu.  Ekki í frásögur færandi í sjálfu sér, hvað þá fréttnæmt, en mér féllust næstum því hendur þegar kom að fjórtánda kafla málfræðibókarinnar.

 

 

 

 

 

 

 

 

Þetta er kafli sem heitir Tvöfaldur samhljóði í algengum orðum.  Fyrstu tvær hendingarnar eru á þessa leið:  Tveir sams konar samhljóðar sem standa hlið við hlið í orði kallast tvöfaldur samhljóði.  Í mörgum orðum er ekki auðvelt að finna eftir framburði hvort skrifa á einfaldan samhjóða eða tvöfaldan.
Hvaða torf er þetta eiginlega?  Tveir sams konar samhljóðar sem standa hlið við hlið?  Sams konar samhljóðar?  Er það ekki einfaldlega einn og sami bókstafurinn, skrifaður tvisvar?  Í mörgum orðum er ekki auðvelt að finna?  Er ekki til gott íslenskt orð yfir það sem ekki er auðvelt?  Erfitt! 
Þetta er það sem lagt er fyrir æsku landsins. 

Hér er hins vegar skemmtilegasta augnablik helgarinnar.  Grunlausir viðskiptavinir Hagkaups í Kringlunni fengu óvæntan kaupauka í formi skemmtiatriðis sem seint verður leikið eftir.  Stöðu sinnar vegna vill listamaðurinn...eða konan...ekki koma fram undir nafni.  Það skal þó upplýst að um þjóðþekktan einstakling er að ræða.

 

 

 

 

 

 

 

Að lokum...mánudagslagið.  Fátt vinnur betur á mánudagsdrunga en Christopher Walken í urrandi banastuði.  Þetta er síðasti mánudagurinn minn sem almannatengill...í tilefni afmælisins í næstu viku ætla ég að færa mig heim til mömmu rúv.  Njótið. 

Athugasemdir

[arnar valgeirsson, 29.1.2008 kl. 23:19]

hvað flokkast undir meiri almannatengsl en að hverfa aftur til ruv???

og til hamingju með það..

en þetta með júróvisjón.. það er alveg undarlegt að þegar þríeykið gáfulega er spurt hvaða lög það haldi að komist áfram, þá er það bara alltaf rétt hjá þeim. segja eitthvað bla bla og þetta er gott en hinsvegar hafi það grun um að hitt lagið komist og abadakabra..... það var rétt.

annaðhvort fá þau að vita kosninguna eða það er einhver ótrúleg flétta í gangi.

mana þig til að koma upp um þau.... en drengirnir mínir hringdu reyndar einu sinni til að kjósa þarna hó hó hó og hey hey hey... en þar fór tvöhundruðkallinn sem farið hefur úr mínum vasa. og sjitt hvað símafyrirtækin eru að græða ótrúlega bigtæm á okkur hálfvitunum.

[Ylfa Mist Helgadóttir, 30.1.2008 kl. 03:26]

Dalvíska handboltahugmyndafræðin? þetta þarfnast nánari útskýringa!

Kveðja frá Dalvíkingi í Bolungarvík.

[Snorri Sturluson, 30.1.2008 kl. 18:55]

Grunnur hinnar dalvísku handboltahugmyndafræði er í rauninni hin almenna og margrómaða dalvíska hugmyndafræði...yfirfærð á handboltann - "Við látum baráttuna aldrei bera fegurðina ofurliði!"

Þar sem íþróttahúsið á Dalvík er/var nokkrum sentimetrum of stutt í annan endann (til að koma dásamlegri sundlaug fyrir undir vesturgafli hússins) og mörkin þar af leiðandi felld inn í veggina byggist dalvískur handbolti á hröðum og öguðum sóknarleik, ókleifri vörn og ótrúlegri skotnákvæmni.  Það er nefnilega frekar óheppilegt að skjóta framhjá og eiga það á hættu að slasa sjálfan sig, samherja og síðast en ekki síst mótherja með óútreiknanlega endurkasti af veggnum.  Hefðu handboltaspekingar undir Esjurótum haft vit á því að meðtaka þessa speki á sínum tíma væru t.d. Bragi Settu og Guðni hæna margverðlaunaðir atvinnumenn í greininni og búið að byggja við skrifstofu HSÍ til að koma öllum verðlaunagripunum fyrir!

Bið að heilsa vestur.