Nanið...

Ég nenni ekki að tjá mig um pólitiskar væringar.  Það er ákveðið ferli komið af stað og hluti mengisins fer í mínar fínustu.

Það var hálf undarlegt að kveðja enska boltann um síðustu helgi.  Kveðjuathöfnin var óþægilega látlaus og lítilfjörleg.  Ég á nú reyndar ekki von á því að þessi sambandsslit hafi teljandi áhrif á geðheilsu og almenn gleðilæti.  Það er samt svolítið skrítið að ljúka tíu ára sambandi, sem í flestum tilfellum var skemmtilegt og gefandi en átti það líka til að vera þreytandi og slítandi, svona bara eins og að flokka sokka á fögru síðsumarkvöldi. 
Mér var svo virkilega brugðið þegar Bjarni Fel lauk keppni í Ensku mörkunum..."Bjarni Fel þakkar tæplega fjögurra áratuga samfylgd í enska boltanum".  Ég fékk kökk í hálsinn og barðist við táraflaum.  Ég lifi í þeirri trú að Nautið beri gæfu til að munstra forvera sinn í bakvarðarstöðunni hjá vesturbæjarstórveldinu í gott djobb, þótt ekki væri nema hlutastarf.  Þetta er mál sem snertir landsmenn alla.
Nú er náttúrulega komin upp sú skemmtilega staða að ég get farið að fella dóma um leiklýsingar og aðrar leikfimisæfingar íþróttafréttamanna sem aldrei fyrr.  Ég á jafnvel von á því að ég muni nýta mér þetta nýtilkomna "frelsi" á komandi vikum.

Nanið.  Ég er búinn að þurfa að lifa við það undanfarna daga að detta í hlátursköst upp úr þurru, eða því sem næst, og stundum við frekar óviðeigandi aðstæður.  Þetta er allt Ingvari Valgeirs að kenna.  Hann birti uppskrift á síðunni sinni á dögunum, hvar nan-brauð kemur við sögu.  Nan-brauðið á auðvitað að hita í ofni og niðurlag uppskriftarinnar er þetta:

Ef ofninn kallar með rödd Eyþórs Arnalds ofsahátt "ég brenni nan í mér" er nanbrauðið rúmlega tilbúið.

Ég þjáist enn af ótímabærum hláturrokum.

Er bara...

...einn auglýsingagerðarmaður á Íslandi?  Þessi sem gerir sjónvarpsauglýsingar flestra stjórnmálaflokkanna og lætur leiðtogana tala við ímyndaða vininn minn sem situr svo oft við hliðina á mér?  Nei, líklega eru þeir tveir.  Hinn hafði vit á því að fá Bjarna garðyrkjustrump og poppspekúlant til að leika í sinni auglýsingu og það á eftir tryggja öruggan og eftirminnilegan kosningasigur.  Ef Bjarni fengi að ráða myndu Pet Shop Boys spila á kosningavökunni.  Ef Bjarni fengi að ráða stæði kosningavakan þá yfir í heila öld.

Ég veit ekkert af hverju, en þessar auglýsingagerðarpælingar leiddu hugann allt í einu að pylsugerðarmanninum sem einokar markaðinn í ónefndu bæjarfélagi sem gaman er að heimsækja við hin ýmsu tækifæri.  Hann hlýtur eiginlega að gera það ansi gott.  Engin samkeppni, engar áhyggjur af markaðsstöðu, ekkert vesen.  Viðskiptavinirnir eru svo himinlifandi með þennan ráðahag að þeir hrópa húrra fyrir manninum í tíma og ótíma.  Nóta bene...þetta er ekki pólitísk pæling!

 

Þetta er ein sú almesta snilld sem sést hefur í netheimum.   Tæplega hundrað þúsund kall...fyrir nákvæmlega ekki neitt.  Bjóðendur eru hugsanlega týpurnar sem slökkva á tölvunni sinni þegar þeir ramba inn á síðu eins og þessa.  

 

Mér barst bréf.  Spurt er um fimm bestu rokkslagara Íslandssögunnar.  Tillögur?

Hvaða...

...höfuðsnillingur er hugsuðurinn á bak við Meistaradeildarleik Vodafone?  Það er búið að hamra á þessum blessaða sms-leik í gærkvöldi og dag með alls kyns auglýsingum og athyglishvötum, enda vinningurinn sérlega glæsilegur, en leikurinn er samt algjörlega út úr kú.  Chelsea er úr leik, en svarmöguleikarnir við spurningunni "Hvaða lið keppa til úrslita í UEFA Champions League" eru samt...A - Manchester United / Chelsea og  C - AC Milan / Chelsea.
Jájá...þetta er smámunasemi...en samt.  Annað hvort átti að ljúka sms-leiknum áður en flautað var leiks Liverpool og Chelsea í gærkvöldi, eða gera viðeigandi breytingar í kjölfar hans.

Ég er búinn að leita dyrum og dyngjum á alnetinu í dag að auglýsingu þar sem harmonikkuleikarar eru hvattir til að smella nikkunni á öxlina og skunda til Íslands.  "Góðir tekjumöguleikar, vinalegt umhverfi, óútreiknanlegt veður.  Húfa og vettlingar við hæfi, en ekki skilyrði".  Finn auglýsinguna ekki, þannig að ótrúleg fjölgun harmonikkuleikara er enn hulin ráðgáta.  Þessi óvænta uppspretta fingrafimra og tónvissra gæðapilta hlýtur að setja ný viðmið fyrir önnur þjóðlönd og hreinlega met af einhverju tagi.
Ég hef rekist á einn og einn síðustu daga, en ökuferð niður Laugaveginn í gær toppaði allt.  8 harmonikkuleikarar fögnuðu baráttudegi alþýðunnar, sex þeirra í vel æfðum og hljómfögrum dúettum og tveir voru frekir til einleiks og fengu því engan til að spila með sér.  Þeir virkuðu samt sáttir og glaðir.  Margir þeirra áttu fínar húfur.

Ég áttaði mig ekki á því að taka mynd fyrr en ég sá glitta í þann áttunda.  Hann er þarna og ef myndin prentast vel má þekkja lagið sem hann leikur.

Plata ársins?

Það er vel hugsanlegt að plata ársins á Íslandi hafi komið út í gær.  Grínlaust. 

Þetta er platan hans Bjarka Sig, sem hingað til hefur birst landsmönnum í hlutverki handboltamanns í fremstu röð.  Bjarki hefur stundum verið skilgreindur sem "bróðir Lalla og Dags", en líklega verður þetta til þess að fjármálamógúllinn í Lúxemborg og handboltahetjan í Austurríki og verðandi framkvæmdastjóri Vals verða héðan í frá skilgreindir sem "bræður Bjarka"!

Þetta er undarlega heillandi og grípandi plata og kemur á óvart við hverja hlustun.  Ég vissi svo sem að Bjarki væri að gutla á gítarinn sinn, en var algjörlega grunlaus um þá hæfileika sem drengurinn býr yfir.  Hann teygir sig, á afar smekklegan hátt, í ýmsar áttir og það má með góðum vilja heyra nokkra áhrifavalda, en allt er þetta þó þegar allt kemur til alls...b.sig.
Ef einhver ætlar að hirða af honum heiðursútnefninguna fyrir plötu ársins er þeim hinum sama vissara að girða sig í brók.  Hugsanlega að fá Sir Paul McCartney til að leggja eitthvað af mörkum.

Eins og tónlistarmanna er siður er b.sig búinn að opna heimasíðu.  Síðan lítur dúndrandi vel út, enda á hún ættir að rekja til Dalvíkur!  Langsótt?  Nee.  Maðurinn á bak við fyrirtækið sem hannar síðuna er Jónas frændi minn.  Heimurinn er lítill og undarlegur.
Það eina sem vantar inn á síðuna er hlustunarmöguleiki, en það skrifast væntanlega á tímaþröng frekar en yfirsjón.  Ég tók mér það bessaleyfi að smella tveimur lögum inn á spilarann hérna til hliðar.  Höfundarréttarkærufrestur rann hvort eð er út á hádegi í dag.

Ég leitaði að gamni að myndum sem tengjast b.sig á veraldarvefnum og sá þá mér til mikillar gleði að í borginni sem aldrei sefur, Nýju Jórvík, hefur hópur hjólreiðamanna komið saman til að fagna útkomu plötunnar.  Þetta eru væntanlega fyrstu merkin landvinninga listamannsins.

Kaupa kvikindið...og ekkert rugl!  Eymundsson og/eða Penninn.  Það er langflottast að kaupa sitt hvort eintakið í sitt hvorri búðinni.

Svipur helgarinnar...

Þetta er...merkilegt nokk...Eggert Magnússon, stjórnarformaður West Ham United.  Þegar myndin er tekin er West Ham yfir, 1-0, gegn Wigan.  Myndasmiðir virðast hafa horfið frá því að taka fleiri myndir, West Ham vann jú leikinn 3-0.

Man.United sýndi mátt sinn og megin um helgina.  Vakninguna í leiknum gegn Everton, og þar með sigurinn, geta United-menn þakkað Ófeigi vini mínum.  Þegar Everton komst í 2-0 í upphafi síðari hálfleiks stóð hann upp frá sjónvarpinu, brá sér inn í svefnherbergi og skipti um föt.  Hann fór í fötin sem hann var í þegar hann heimsótti Old Trafford í fyrsta sinn í tilefni fergugsafmælisins fyrir skemmstu.  Skömmu síðar datt United í gírinn.
Þetta er ekki í fyrsta sinn sem Ófeigur hefur bein áhrif á gang mála í íþróttakappleikjum.  Hann hefur tryggt Man.United og KA ófáa sigra og titla í gegnum tíðina með frumsaminni og frumlegri setustellingu við sjónvarpið.  Sjúkraþjálfarinn telur líklegt að með nokkuð reglulegri meðferð muni hann ná að vinna á svæsnustu bakverkjunum.

Árshátíð Skjásins um helgina.  Fátt óvænt.  Engir skandalar.

Lítill heimur!

Fyrir nokkrum árum lék stjórnarformaður Orkuveitu Reykjavíkur knattspyrnu með hinu fróma knattspyrnuliði Skallagrími.  Guðlaugur þótti nothæfur knattspyrnumaður, líklega er best að lýsa honum þannig að dugnaðurinn og eljan hafi borið fegurðina ofurliði.  Allar fullyrðingar um að mannfæðin í Borgarnesi hafi gert það að verkum að Guðlaugur var byrjunarliðsmaður í annarri deildinni (núverandi fyrstu deild) eru á misskilningi byggðar.

Guðlaugur skoraði eitt umtalaðasta sjálfsmark íslenskrar knattspyrnusögu.  Umtalið er aðallega tilkomið vegna glæsileiks og fegurðar.  Því er haldið fram enn þann dag í dag að þetta sé fallegasta mark sem skorað hefur verið á Akureyrarvelli.  Gulli tók boltann á lofti, vel fyrir utan teig, og smurði hann upp í vinkilinn fjær.  Þetta var eitt þrettán marka sem KA skoraði gegn Skallagrími í leik sem ekki er skráður til bókar og markið góða er því ekki mark í opinberum skjölum.  Borgnesingar sögðu sig nefnilega frá keppni fljótlega eftir þennan leik, með markatöluna 4-99, og þar með voru úrslit leikja þeirra þetta sumar dæmd ómerk. 
Markið góða hefur hins vegar lifað sjálfstæðu lífi.  Þeir sem voru á Akureyrarvelli og sáu þetta með eigin augum hafa verið duglegir að segja frá og lýsa markinu í smáatriðum, draga ekkert undan og stundum upplifa sögumenn m.a.s. svipaðar tilfinningar og þeir fundu fyrir þegar boltinn söng í netinu, rétt neðan við þverslána og alveg úti við stöng.  Það er merkilegt að verða vitni að því þegar allar þessar tilfinningar brjótast fram.  Ég sá leikinn ekki sjálfur, en fjölmargar lýsingar frá ólíklegustu aðilum og frá hinum ýmsu sjónarhornum gera það að verkum að ég upplifi þetta rétt eins og ég hafi verið á staðnum.  Ég er ekki einn um það.
Markið kemur til með að fylgja stjórnarformanni Orkuveitu Reykjavíkur um ókomna tíð.  Markið kom m.a.s. við sögu á árshátíð MA.  Í miðju skemmtiatriði, sem kom knattspyrnu nákvæmlega ekkert við, kom maður í Skallagrímsbúningi hlaupandi inn á sviðið, sveiflaði fæti að hætti fótafimra Borgnesinga og féll svo í gólfið í svekkelsi.  Það skildu allir brandarann. 
Hér er einmitt kominn ástæðan fyrir þessari ótímabæru upprifjun þessa merka augnabliks í íslenskri knattspyrnu.  Leikarinn góði, sá sem klæddist Skallarímstreyjunni og kom á örskotsstundu á framfæri bæði gleði og svekkelsi með eftirtektarverðum og eftirminnilegum hætti, er farinn að vinna með mér.  Á hverjum einasta morgni óska ég Eiríki velfarnaðar í leik og starfi og á sömu andrá rifjast upp fyrir mér þetta frábæra mark, sem ekki var mark, sem ég sá ekki, en hef samt upplifað í gegnum samferðarmenn og markaskorarann sjálfan.  Við megum ekki gleyma þessu marki!

Framlag til vítaspyrnuvælsins í Mourinho.  Maðurinn fer að detta í það að vera hundleiðinlegur.
Þetta er tölfræði frá Infostrada. 

Staðreynd :Víti gegn toppliðunum eftir að Mourinho kom til Englands:

Á Old Trafford:
06/07: Bolton, Gary Speed, mark
06/07: Wigan, Leighton Baines, mark
06/07: Arsenal, Gilberto Silva, klikk
04/05: WBA, Robert Earnshaw, mark

Á Highbury/Emirates:
06/07: Blackburn, Shabani Nonda, mark
04/05: C. Palace, Andy Johnson, mark

Á Stamford Bridge:
05/06: Fulham, Heidar Helguson, mark
05/06: Blackburn, Craig Bellamy, mark

Á Anfield:
05/06: Chelsea, Frank Lampard, mark 

 

Rakst svo á þessa frétt á Reuters.   Þetta heitir að draga rökréttar ályktanir!

 

 

BELGRADE (Reuters) - Serb media responded on Wednesday with a sense of pride and patriotism that a new mineral had been found in Serbia closely resembling the makeup of fictional "kryptonite," which rendered Superman helpless.

Reacting to the discovery of the real new mineral in western Serbia, they pointed out that "kryptonite" was created from the remains of Superman's home planet Krypton, destroyed in a fireball.

"Superman is a Serb!" was the conclusion drawn in headlines favored by several newspapers.

The daily Kurir said: "Finally we have scientific proof that we are God's own people!"
Even the staid pro-government daily Politika joined in the fun, speculating that the 'S' on the Man of Steel's blue costume really stood for 'Serbia'.

In the comics, Superman would do anything to avoid kryptonite, whose glowing green crystals sapped his powers.
The actual mineral found at a mine near Jadar does not glow, is not radioactive, has very tiny crystals and is white rather than green. It is to be named Jadarite.

While concluding an extensive examination of its unique chemistry, mineralogist Chris Stanley of London's Natural History Museum stumbled on a close match with 'kryptonite', as described in the movie 'Superman Returns'.
The museum quoted Stanley as saying he searched the Internet for the mineral's formula -- sodium lithium boron silicate hydroxide -- and found the same scientific name written on a case containing kryptonite stolen by Lex Luthor in the movie.

Þetta...

...finnst mér fyndið!

 

Samkvæmt lið nr. 24 eru Google-menn þeirrar skoðunar að hentugasti ferðamátinn milli New York og Parísar sé...sund!

Ég fletti upp leiðbeiningum um það hvernig ég kemst akandi frá New York til Angelica, hvar ég dvaldi við nám og leik fyrir fáeinum árum.  Það á að vera tiltölulega einfalt að keyra þarna á milli, en leiðbeiningar Google eru í 21 lið!  Teknar eru fram aflíðandi beygjur á veginum.
Ökuleiðin Buffalo - Angelica, sem er jafnvel enn einfaldari, er í 18 liðum.  Ég er ekki frá því að ég muni eftir kúnni sem minnst er á að standi jórtrandi í túnjaðri Old State Road.

 

Þetta finnst mér líka kjánalega fyndið... 

Enn er von!

Þetta er Gene Gnocchi, vinsæll ítalskur sjónvarpsmaður og spaugari.

Gnocchi, sem er 52 ára, er einn stjórnenda Quelli che il calcio, sem er fótboltaættaður þáttur á sjónvarpsstöðinni Rai Due.  Hann biðlaði fyrir skemmstu til stjórnenda liðanna í Serie A um að gefa sér tækifæri til að spila í svo sem eins og fimm mínútur í deildarleik.  Gnocchi hefur löngum haldið því fram að fjölmargir leikmenn í Serie A séu ofmetnir, hreinlega ekki nógu góðir til að spila í einni sterkustu fótboltadeild heims og hann vill meina að hann sé sjálfur jafngóður, ef ekki betri, en stór hluti þessara leikmanna.  Hann bað því um tækifæri til að sanna þessa kenningu og réttlæta gagnrýnina.  Ekki ómerkari menn en Alessandro Del Piero og Marcello Lippi gengu í lið með Gnocchi og Atalanta, Siena og Torinso sýndu málinu áhuga.  Bologna, sem reyndar spilar í Serie B, bættist í hópinn, en svo fór að lokum að blautasti draumur Gnocchis rættist...hann gerði samning við uppáhaldsliðið sitt, Parma. 
27.mars sl. samdi Gene Gnocchi við Parma til loka leiktíðarinnar.  Hann er á launaskrá, fær lágmarkslaun ítalskra atvinnumanna í knattspyrnu sem eru í kringum ein og hálf milljón ísl. króna yfir leiktíðina.  Gnocchi valdi sér treyjunúmerið 52, sem er náttúrulega beintenging við aldur kappans, og knattspyrnunafnið Gnoccao, sem er einhvers konar Brasilíu-paródía.  Reiknað er með að Gnocchi fái að spreyta sig í lokaumferð Serie A, sem fram fer þann 27.maí, en þá á Parma leik gegn Empoli.  Ef svo fer, sem reyndar margt bendir til, að Parma verði á þessum tímapunkti enn að berjast fyrir lífi sínu í Serie A gæti þó orðið breyting á áður auglýstri dagskrá.

Vantar Val eða FH ekki alltaf þokkalegan miðjumann til að spila fimm mínútur eða svo í leik?  Treyjunúmerið yrði talsvert miklu lægra en 52!  Ég væri jafnvel til í að skoða ÍA...ef ég fæ að sleppa ísböðunum.

Vorboðinn ljúfi!

Þvottaplön.  Algjört lykilatriði í árstíðarskilgreiningum á Íslandi.  Það er svo merkilegt að landsmenn rýna frekar í dagatalið og fyrirbæri eins og sumardaginn fyrsta þegar þeir meta það hvort "óhætt" sé að þvo bílinn á næsta þvottaplani.  Þetta snýst eiginlega ekki um hlýnandi veður og aukna geðprýði.  Það er bara búið að ákveða það að sumarið sé komið og þar með er það orðið bíleigendum gríðarlega mikilvægt að standa lopnir og kalnir á tánum á næsta þvottaplani.  Til að auka á vellíðan er vatnið við frostmark, en þá er bara að bíta á jaxlinn af enn meiri krafti og taka þetta á karlmennskunni.  Það er jafnvel til í dæminu að menn bíti sig til blóðs, bara til að draga athyglina frá máttleysinu í frostnum fingrunum og suðinu í eyrunum.
Ég sá mann sem var að bóna bílinn sinn við bensínstöð fyrir hádegi í dag.  Hann var blár á vörunum og mér sýndist olnbogarnir vera frostnir fastir.  Bónið fraus á bílnum og ef einhver labbaði framhjá fauk fíngert bónduftið út í veður og vind.  Samt sýndist mér bónarinn vera nokkuð sáttur.  Hann var jú að sinna sumarverkum.  Á stuttermabol. 

Svona var umhorfs við þvottaplanið á ónefndum stað.  Biðröð, hvað þá annað.  Þetta er nett geggjun...

 

 

 

 

 

 

 

 

Ég heyrði aðeins í Bjarna Harðar í útvarpinu í gær.  Man ekkert um hvað hann var að tala, en við þessa hlustun rifjaðist upp fyrir mér útvarpspistill sem hann flutti fyrir einhverjum mánuðum.   Bjarni setti þar fram áhugaverða "kenningu" um einn mesta kappa Íslandssögunnar, Gunnar á Hlíðarenda.  Bjarni hafði, eftir miklar pælingar, komist að því að Gunnar hefur mjög líklega verið heyrnarlaus.  Hann hafði jú einna mest samskipti við hinn skegglausa Njál á Bergþórshvoli og samtöl þeirra gengu mjög gjarnan út á það að Njáll var að leggja Gunnari línurnar fyrir væntanlegan hitting, t.d. þegar hann hugðist biðja sér konu.  Njáll sagði Gunnari hvað hann ætti að segja, hvert svarið yrði og hvernig hann ætti að svara því...og svo koll af kolli.  Gunnar var s.s. að fá handrit að væntanlegu samtali.  Skeggprýði var jú landlæg á árum áður, sem gerði Gunnari erfitt um vik, ef kenningin er rétt.  Skeggið gerði það að verkum að hann átti erfitt með að lesa af vörum...nema þegar hann "talaði" við Njál...sem var skegglaus með öllu. 
Ekki nóg með það.  Til eru sögur af því að hestur hafi sparkað í höfuð Gunnars hvar hann reið framhjá.  Þetta er varla hægt nema að Gunnar hafi verið krjúpandi eða hreinlega liggjandi, sem fátt bendir til.  Skýringin?  Jú...hann var dvergvaxinn!  Það skýrir það þá í leiðinni hvers vegna honum reyndist tiltölulega auðvelt að stökkva hæð sína í fullum herklæðum.  Gunnar á Hlíðarenda var s.s. heyrnarlaus dvergur, samkvæmt þessari kenningu Bjarna Harðarsonar.

Á meðan ég man.  Ég get haft milligöngu um eigendaskipti stálfelga og rándýrra hjólkoppa undan...og undir...Mercedes Benz.  Umsýslugjald mitt er sanngjarnt og greiðslufyrirkomulag umsemjanlegt.

 

 

 

 

 

 

 

 

Hjólkopparnir eru handsmíðaðir á litlu verkstæði í suðurhluta Svartaskógar og þykja mjög fínir.  Hér gefst kærkomið tækifæri til að eignast ótrúlega vandaða vöru, sem mjög líklega mun vekja aðdáun og öfund samferðafólks.  Ég myndi m.a.s. segja að hér væri komið tilefni til að fjárfesta í bifreið af gerðinni Mercedes Benz, ef slík er ekki til eignar nú þegar, þótt ekki væri til annars en að geta stært sig af hjólkoppunum.

Má þetta???